ILOILO CITY- Padayon pa nga ginapangita ang isa ka lalaki nga estudyante nga nagbuno sa kaangay niya nga estudyante sa gwa sang isa ka eskwelahan sa Janiuay, Iloilo.
Ang biktima isa ka 17-anyos nga grade 12 student sang Janiuay National Comprehensive High School samtang ang suspek naman amo si Dionisio Belaong,18-anyos, residente sang Janipaan Oeste, Cabatuan kag estudyante man sang amo nga eskwelahan.
Sa interview sang Bombo Radyo kay PLT. Alwin Salmon, hepe sang Janiuay Municipal Police Station, iya ginpahayag nga base sa imbestigasyon, ginbantayan sang suspek ang biktima sa gwa sang eskwelahan, gintapungol niya ini kag sang nagbato, didto na nagkuha sang kutsilyo ang suspek kag ginbuno ang menor de edad kag madasig nga nalagyo.
Suno kay Salmon, may daan na nga hiligit-anon sa tunga sang biktima kag suspek.
Desidido naman nga magpasaka sang kaso batok sa suspek ang pamilya sang biktima nga padayon pa nga ginabulong sa ospital bangud sa naangkon nga pila sa iya wala nga kilid.
Samtang, ginapaimbestigaran na sang Department of Education ang natabo nga stabbing incident sa gwa sang Janiuay National Comprehensive High School kun sa diin involved ang duha ka mga estudyante.
Sa interview sang Bombo Radyo kay Mr. Leonil Salvilla, spokesperson sang Department of Education Division of Iloilo, iya ginpahayag nga isa ka mayor nga concern ang seguridad sang mga estudyante sa sulod man ukon sa gwa sang eskwelahan.
Suno kay Salvilla,nakig-angot na sila sa pamunuan sang eskwelahan agud makahimo sang nagakaigo nga tikang agud nga malikawan ang kaangay nga hitabo.
Pahayag niya, dako man ang papel sang Janiuay Municipal Police Station agud nga matahap ang mga estudyante nga magdala sang ano man nga hinganiban.
Nagpangabay naman ini sa mga ginikanan nga giyahan sang maayo nga talupangdon ang paminatasan sang ila kabataan ilabi na nga dako ang epekto sang pandemya sa mental health sang estudyante.
