ILOILO CITY- Nakapauli na sa ila balay ang lalaki nga reported missing matapos ginpahayag nga naglumpat sa baybay sang Sto.Niño Sur, Arevalo, Iloilo City sang nagligad nga Huwebes.
Ini amo si John Mark Jumento, 21, kag residente sang nasambit nga barangay.
Sa interview sang Bombo Radyo kay Jumento, iya ginpahayag nga wala ini sya sa iya husto nga paminsaron bangod nga hubog ini sang natabo ang insidente.
Suno kay Jumento, mga duha ka oras siya nga nagpalutaw-lutaw sa dagat kag sang naumpawan, yara na ini sa area sang San Juan Molo, Iloilo City.
Dugang niya, naglangoy siya tubtob nakalab-ot sa Calumpang, Molo kag naglakat ini padulong sa Fort San Pedro, City Proper kag ginlakat naman pauli sa ila balay.
Nagpangayo naman sang pasaylo si Jumento sa natabo kag wala man siya sang ihibalo nga gin-report siya nga missing.
