ILOILO CITY- Ginbawian gid sang kabuhi ang isa ka lalaki nga nag-amok sa banwa sang Oton, Iloilo kag natiruhan sang pulis.
Ang biktima amo si Marjune Millar,36, residente sang Barangay Buray, Oton, Iloilo nga nag-angkon sang pilas sa tiyan.
Sa interview sang Bombo Radyo kay PMaj Fernand Limbungan, hepe sang Oton Municipal Police Station, iya ginpahayag nga una nila nabaton ang impormasyon nga may lalaki nga naga-amok sa amo nga lugar kun sa diin nakalab-ot pa ang lalaki sa plaza sang banwa.
Suno kay Limbungan, nagtuga sang kakugmat sa mga tawo sa lugar ang aktwasyon sang lalaki nga may ginauyatan pa nga kutsilyo.
Pahayag sang hepe, sang ginatinguhaan sang mga pulis nga mapakalma si Millar, hinali lang sini nga ginsaruso si Police Corporal Mark Vienard Villanueva kag didto na natiruhan ang lalaki.
Base sa pagpangusisa sang kapulisan, tatlo na ka adlaw nga wala nakakaon ang lalaki rason sang pag-amok sini.
