SIBUNAG, GUIMARAS – Patay ang isa ka lalaki matapos aksidente nga matiruhan sa Brgy. Ayangan, Sibunag, Guimaras.
Ang biktima amo si Arnel Gamilong, 35, sang nasambit nga lugar samtang ang suspek naman amo si Antonio Bidaua, 51, tumandok sang Barotac Viejo, Iloilo.
Sa interview sang Bombo Radyo kay Police Captain Rico Sta. Ana, hepe sang Sibunag Municipal Police Station, iya ginpahayag nga yara sa sulod sang payag si Bidaua sang aksidente nga naglupok ang 12 gauge shotgun kag naigo si Gamilong nga yara sa sagwa sang payag.
Indi lang matul-id ni Sta. Ana kun bala hungod nga ginpalupok ukon ginatinlu-an ni Bidaua ang armas sang natabo ang aksidente.
Ginpahayag ang hepe nga nagalantaw sang mga manok ang biktima sang maigo sang bala.
Gindala pa sa ospital ang biktima suno kay Sta. Ana apang ginbawi-an sang kabuhi makaligad ang pila ka oras.
Napasakaan naman sang kaso nga homicide kag paggamit sang indi lisensyado nga armas-luthang ang suspek.
