ILOILO CITY – Wala na natabangan pa ang isa ka lalaki matapos nga naghikog sa Brgy. Cansilayan, Buenavista, Guimaras
Ang biktima ang ginkilala nga si alyas Mokong, 40, tricycle driver kag panday sang nasambit nga lugar.
Sa interview sang Bombo Radyo kay Police Capt. Jeffrey Ferrer, hepe sang Buenavista Municipal Police Station, iya ginpahayag nga naghikog ang biktima sa atubang mismo sang ila nga balay paagi sa pagluthang sa iya kaugalingon gamit ang 12 Gauge Shot Gun.
Suno kay Ferrer, indi pa matumod sang pamilya ang rason sang paghikog sang biktima bangud wala man sang kontra sa ila lugar, wala man sang record sa police station kag wala man sang problema ang ila himata.
Antes pa man nagluntad ang nasambit nga insidente, indi na maistorya sang maayo ang biktima kag malaka na lang nagahambal.
Indi na ini ang una nga kahigayunan nga naghikog ang biktima apang sa una, napunggan ini sang iya pamilya.
Patal nga pilas sa dughan ang ginkamatay sang biktima.
