Nagalalain ang isa ka enforcer sang Local Economic Enterprise Office (LEEO) matapos ginapahayag nga ginhaboy ini sang kalubay samtang nagapatigayon sang clearing operation sa corner sang dalan Jalandoni-Ledesma sa City Proper.
Sa interview sang Bombo Radyo kay Dante Mangalisan, iya ginpahayag nga nagatindog lang siya samtang naga-istorya sa mga bulantero kagab-i sang hinali nga naigu ini sang kalubay sa iya nga panga.
Suno sa iya, tuman ini ka sakit bangud ginabanta masobra tunga sa kilo ang kabug-aton sang kalubay.
Wala sini makit-an kun sin-o ang naghaboy sa iya.
“Medyo nagsaka ang dugo ko eh. Naga-implementar man lang ta. Naghipos sila tanan sang nagsinggit ko kun sin-o ang maisog sa ila. Kalawig sang hambal ko, ‘gwa da ang maisog, atubanga ko para bal-an ta’,” suno kay Mangalisan.
Kasunod sini, nagpa-blotter siya sa police station para nga may opisyal nga record ang natabo.
“Daw kami pa ang [ginadumtan], tapos sila pa ang maisog. Indi man na pwede. Ang amon obligasyon, gina-obra lang namon,” dugang sini. “Sila na na. Bahala na na kun ano ang ila gusto. Atubangon ko sila bisan ano oras.”
Pahayag sini, ini ang iya una nga bes nga napatup-an siya samtang nagapatigayon sang operasyon.
“Galain gid ang buot ko eh, tani prangkahon ko nila, hagaron ko nila kun gusto nila inaway te okay atubangay kami eh. Ako wala ko ya nakulbaan sang inaway nga na eh,” dugang sini.
“Ang akon, para lang sa husto tani. Maayo na bala nga gatindog ka lang da nga wala ka ya kabalo, habuyon ka sang kalubay?”
Nahibaluan nga nagalibot sanday Mangalisan agud mangsaway kag istoryahon ang mga bulantero nga ginapili lang ang adlaw nga mahimo sila makabaligya sa amo nga lugar.
Ginapahayag nga pasado alas dies sa gab-i kagabi natabo ang insidente samtang ginapahangop sa mga manugbaligya nga indi sila pwede makaplastar sang ila baligya sa amo nga area.#
