Pa-imbestigaran sang Local Economic Enterprise Office (LEEO) ang natabo sa isa sa ila enforcers nga ginapahayag ginhaboy sang kalubay samtang nagapangsaway sang mga nagabulante sa corner sang dalan Jalandoni-Ledesma sa Iloilo City Proper.
Ginpahayag ini ni LEEO head Maricel Mabaquiao matapos ang pahayag ni Dante Mangalisan nga na-igu gid ang iya panga sang kalubay pasado alas dies kagab-i.
Wala pa sini mahibaluan kun sin-o ang naghaboy sa iya.
Suno kay Mabaquaio, luyag gid sang mga bulantero nga makaplastar sila sang baligya sa area apisar pa indi ini designated area.
Pahayag sini, nagbutang na sila sang lugar kun sa diin pwede makabulante, apang nagabalik gihapon ang amo nga mga manugbaligya sa amo nga area.
“Kagab-i, ginpaathag pa gid sang team naton nga kun Martes sa Super; kun Myerkules, sa La Paz; kun Thursday, sa Jaro; kun Byernes, sa Mandurriao; Sabado, sa La Paz; kag Domingo, Arevalo,” pahayag sini. “Pero ipa-investigate ko pa kun tuyo gid man siya nga habuyon.”
Pahayag pa sini, nagpahanumdom siya sa mga enforcer nga magsunod gid sa maximum tolerance kag ipahangop gid sa mga bulantero ang pagsulundan.
Magluwas sa ila teams suno kay Mabaquiao, may yara man sang pulis para sa seguridad.
Natalana man nga mag-set sang meeting ang LEEO agud mahitso ini nga problema.
Nahibaluan nga nagalibot sanday Mangalisan agud mangsaway kag istoryahon ang mga bulantero nga ginapili lang ang adlaw nga mahimo sila makabaligya sa amo nga lugar.
Ginapahayag nga pasado alas dies sa gab-i kagabi natabo ang insidente samtang ginapahangop sa mga manugbaligya nga indi sila pwede makaplastar sang ila baligya sa amo nga area.#
