ILOILO CITY- Ginhangkat sang myembro sang LGBTQ community ang taxi driver nga nag-harass sa iya nga mag-atubangay sila.
Ini kasunod sang alegasyon sang taxi driver nga antes natabo ang akto sang pag-harass niya sa pasahero kag nakuhaan pa ini sang video sang tagreklamo, may transaksyon nga natabo sa ila nga duhaa kun sa diin ginsukot niya sang P1,000 ang pasahero apang wala sila nagsugtanay.
Ang driver amo si Leopoldo Estabillo Jr., residente sang Lambunao,Iloilo kag ang taxi unit nga ginmaneho sini amo ang iya sang Julix Taxi Transport Corp.
Ang tagreklamo amo si alyas Ken nga nagsakay halin sa isa ka mall sa Iloilo City Proper kag nagpadul-ong sa Barangay Progreso, Lapuz, Iloilo City.
Sa interview sang Bombo Radyo kay alyas Ken, iya ginpahayag nga lunsay kabutigan ang pahayag sang driver bangud kun matuod ang mga ini,wala nagapanago ang nasambit nga taxi driver.
Suno kay alyas Ken, desidido na ini nga magpasaka sang kaso batok kay Estabillo bisan pa nga magpangayo ini sang pasaylo bangud indi niya luyag nga matabo man ini sa iban nga pasahero.
Una na nga naghingyo ang tagreklamo nga indi lang pagpakita ang iya nawong agud indi man mabutang sa alang-alang ang iya seguridad.
