ILOILO CITY – Padayon ang contact tracing sang Local Government Unit sang Guimbal agud mahibalu-an ang mga naka close contact sang labing una nga pasyente nga nagpositibo sa Coronavirus Disease 2019 (COVID-19) sa Iloilo.
Sa interview sang Bombo Radyo kay Guimbal Vice Mayor Jennifer Garin Colada, iya ginpahayag nga naistorya na niya ang pamilya sang pasyente kag ginhingyo nga magpaidalom sa self-quarantine.
Suno kay Colada, ginapasalamatan niya ang pamilya sa pagkooperar matapos natukiban nga nagpositibo sa virus ang ila himata.
Ginpahayag ni Colada nga gina-trace naman ang mga nakaupod sang pasyente sa simbahan sa Guimbal bilang isa ka layminister kag nakapatigayon pa sang pagpangalawat antes nagpositibo sa COVID-19.
Sugod subong nga adlaw, magapanghatag sila sang home quarantine pass sa kada pamilya kag bukas ang linya sang Municipal Health Office para sa mga may pamangkot.
