Padayon ang pagpanawagan sang National Meat Inspection Service (NMIS) sa mga local government units (LGUs) nga magbalay sang Local Meat Inspection Ordinance kag magpain man sang pondo agud nga mas mapaayo pa ang mga slaughterhouse sa ila nga lugar.
Sa interview sang Bombo Radyo kay NMIS Regional Director Dr. Randy Lontoc, iya ginpahayag nga kun may ordinansa ang banwa ukon syudad, may basehan man ang meat inspector agud nga masaway ang naga-ihaw lang sa higad-higad.
Kun ipaagi sa lehitimo nga slaughterhouse ang mga karne, mapasigurado suno kay Lontoc nga safe ang meat products.
Sa syudad sang Iloilo suno sa direktor, bangud sang maayo nga local meat inspection system, nakit-an nga mas nagdamo na ang volume sang karne ang nagahalin sa accredited slaughterhouse kag nag-amat amat na biya ang mga tawo sa backyard slaughtering.
Sa rekord sang NMIS Western Visayas, ginapahayag nga 180 lang ka sapat kada adlaw ang ginadala sa slaughterhouse sa syudad sang una, apang subong suno sa direktor, nagdangat na ang ginaihaw sa 260 tubtub 280 kada adlaw.
Kun may yara sang Local Meat Inspection Ordinance suno kay Lontoc, mas mahatagan man sang ngipon ang pagdagdag sang penalidad para sa mga nagalapas nga manug-ihaw.
Sa subong, ang nagaisahon nga double A (AA) accredited slaughterhouse sa Panay amo ang nahamtang sa Ibajay, Aklan.
Sa probinsya sang Iloilo, malapit na lang nga ma-accredit sa AA ang slaughterhouses sa banwa sang Pototan kag Miagao.
Kun ang karne nag-agi sa slaughterhouse nga may AA accreditation, pwede nga mabaligya ang meat products sa guwa sang LGU kag sa rehiyon.
Ang karne naman halin sa AAA-accredited nga slaughterhouse ang pwede indi lamang para sa domestic meat trade kundi pati sa exports bangud kumpleto ini sa pasilidad. ##
