Ginpang-luthang sang isa ka soldado ang apat ka mga kaupdanan sini nga nagakatulog sa Camp Evangelista sa Cagayan de Oro.
Suno sa Philippine Army 4th Infantry Division (4ID), lima ang patay sa amo nga insidente lakip na mismo ang suspek nga si Pvt. Johmar Villabito.
Sa separado nga statements sang Army’s 4th Infantry Division kag Cagayan de Oro City Police Office, ginpahayag nga nagsulod si Villabito sa sleeping quarter nanday Sgt. Rogelio Rojo, Cpl. Bernard Rodrigo, Pfc. Prince Kevin Balaba kag Pvt. Joseph Tamayo kag isa-isa nga ginpangluthang gamit ang iya nga service firearm.
Ang mga nagkalamatay ang lunsay napaidalom sa Headquarters Service Battalion sang 4th ID.
Pilason naman si Sgt. Braulio Macalos.
Nakabugtaw ang iban nga mga soldado kag nag-responde sanday Pvt. Mark Anthony Aguinid kag Pfc. Josiah Estrada nga amo ang nakatiro-patay sa suspek.
Indi pa subong maathag ang motibo sang suspek kag indi man makumpirma nga relationship-related ang rason.
May gintukod na ang 4ID nga Board of Inquiry Team agud mag-coordinate sa pulis para sa imbestigasyon. ##
