Ginalauman nga magadagsa ang linibo ka mga Ilonggo kag deboto subong nga adlaw, Pebrero 2, para sa kapistahan ni Nuestra Señora de la Candelaria nga amo ang patrona sang bilog nga Western Visayas.
Santo ini sa pag-estimate sang awtoridad nga subong masako sa pagpatuman sang security kag traffic measures diri sa Iloilo City.
Sa bisperas pa lamang kagab-i, madamo na sang mga deboto ang nagkadto sa Jaro Metropolitan Cathedral kag nagsaksi sa koronasyon sang milagroso nga imahe. Ginpangunahan ini ni Most Rev. Midyphil B. Billones, DD., Archbishop of Jaro.
Antes ang Solemn Coronation, ginpatigayon anay ang Solemn Vesperal Mass sa katedral kun sa diin ang nag-preside amo si His Grace Most Rev. Jose Romeo O. Lazo, DD, Archbishop-Emeritus sang Archdiocese of Jaro.
Sa iya misa, ginpaambit ni Lazo ang dako nga bahin sang pagsabat ni Maria sa plano sang Dios.
Pahanumdom ini suno kay Lazo nga may yara sang Iloy nga amo ang nagdala sang kapawa sa tunga sang kadulom– mangin sa pamilya, katilingban, ulubrahan, pungsod, ukon sa kalibutan.
Sa mensahe naman ni Very Rev. Fr. Jose Alberto Guillen, V.F., Priest-Team Moderator sang National Shrine of Our Lady of Candles kag Saint Elizabeth of Hungary Cathedral, ginpahanumdom sini nga nangin mapainubuson ang Mahal nga Iloy sang ginpakigbahin sini ang iya Anak nga amo ang Kapawa sang kalibutan.
Ini nga mga kinaiya, suno kay Guillen, ang mahimo man mailog sang mga tumuluo subong nga panahon paagi sa pagkamasinulundon sa kabubut-on sang Mahal nga Diyos kag pag-angkon sang accountability sa mga buhat.
Alas otso subong nga aga, patigayunon ang Solemn Pontifical Mass nga pangunahan ni Billones nga magamarka man sang iya una nga tuig bilang arsobispo sang Jaro. Kadungan sini, patigayunon man ang pagbendisyon sang mga kandila.
Sadtong Pebrero 1981, matandaan nga mismo si Saint John Paul II ang nagkorona sa imahe ni Nuestra Señora de la Candelaria kadungan sang iya nga Apostolic visit sa Pilipinas.
Si Nuestra Señora de la Candelaria amo ang isahanon nga Marian image sa Pilipinas nga ginkoronahan sang isa ka Santo Papa nga subong isa na ka Santo.
(Photo: Archdiocese of Jaro, Commission on Social Communications)
