ILOILO CITY – Nagakadapat nga magbuligay ang gobyerno kag pribado nga sektor agud mas mapahangop ang publiko may kaangtanan sa nagapadayon nga krisis nga gintuga sang makamamatay nga balatian nga Coronavirus Disease 2019.
Sa interview sang Bombo Radyo kay Guimbal Mayor Oscar Garin, iya ginpahayag nga nagapati siya nga dako ang katungdanan sang gobyerno kag pribado nga sektor sa pagpahangop sa publiko sang nagaka igo nga impormasyon natuhoy sa nasambit nga balatian.
Ini agud mabuhinan ang kahadlok nga yara sa ila nga posible magtuga sang kakugmat kag pagpanic.
Suno kay Garin, nagakadapat man nga unahon solbaron ang problema subong sang tawo sa kakulangan sa pagkaon bangud sa nangin epekto sang pagpatuman sang enhance community quarantine sa ila mga trabaho.
Dugang sang natungdan, kun indi ini paghatagan sang igtalupangod sang gobyerno mas madamo pa ang mapatay sa gutom kun ipaanggid sa mga nagpositibo sa COVID-19.
