Pat-od nga nabatian mo na sa imo Lolo kag Lola ukon nabasahan sa libro ang mga istorya sang Tiempo Hapon diri sa Pilipinas.
Apang nakahibalo ka bala? Pila sa mga Hapon ang may nabilin nga kabataan diri sa Pilipinas kag subong lamang nga tuig nakatigayon nga nakabalik sa Japan.
Ini ang kaangay sang istorya sang 82-anyos nga Filipino-Japanese nga si Margarita Hiroko Koyama nga nabayaan sang iya amay nga Japanese national sang World War II sang 1945.
Taga-Digos, Davao Del Sur gid si Lola Margarita.
Ang amay niya amo si Tomaho Koyama nga nag-abot sa Pilipinas antes pa man ang gyera kag nakapangasawa ini sang isa ka Pinay.
Apang pag-abot sang 1945 nga panahon sang World War II, ginbihag sang mga soldado sang Amerika si Tomaho kag ang iya nga mga anak antes pa man nag-surrender ang Japan sang Agusto 14, 1945.
Kasunod sadto, gin-deport si Tomaho sa Japan apang nabilin naman diri sa Pilipinas ang iya nga asawa kag mga anak.
Makaligad ang tatlo ka tuig, napatay man si Tomaho sa Fukuoka Prefecture sa Japan.
Natigayon naman nga na-restore ni Lola Margarita ang iya nga Japanese nationality sang 2017, nakakuha sang Japanese passport sang 2019, apang bangud sa posibilidad nga madagdagan sang Philippine Immigration sang daku nga penalidad kag iban pa sulukton, wala siya gihapon nakabalik sa Japan.
Subong lamang nga Septyembre 2023, si Lola Margarita ang nangin labing-una nga war-displaced descendant sang Japanese migrant nga nakabalik sa Japan.
Ini kasunod sang negosasyon sang Philippine Government kag sang mga opisyal sang Japanese Embassy nga naga-waive sang multa sa mga kaangay ni Lola Margarita.
Plano naman sang Lola nga magbisita sa pantyon sang iya amay.
Ginpakigbahin sini nga wala gid niya na-imagine nga makatapak siya sa Japan, kag tubtub subong, wala pa sini nahibaluan kun ano ang iya una nga ihambal sa iya amay nga halos indi na niya madumduman ang itsura.
Ginpahayag naman sang mga opisyal sang embahada sang Japan diri sa Pilipinas nga magapadayon ang Japanese government sa pagbulig sa mga war-displaced descendants nga makabalik sa Japan. #
