Ginkumpirma sang Philippine Atmospheric, Geophysical, and Astronomical Services Administration (PAGASA) nga nahimo na nga tropical depression kag nakasulod na sa Philippine Area of Responsibility (PAR) ang Low Pressure Area (LPA) nga ila nga gina-monitor.
Ginhingadlan ini nga Bagyo Ester.
Gina-forecast nga magadala ini sang pag-ulan sa Batanes subong ng adlaw, Hunyo 5.
Sa latest data halin sa state weather bureau, ulihi nga nakit-an ang sentro sang bagyo sa 220 kilometers naaminhan nakatundan sang Itbayat, Batanes; may dala nga kabaskugon sang hangin nga 45 kilometers per hour malapit sa sentro; kag may pagmadlos nga tubtub sa 55 km/h.
Nagahulag ini pa-naaminhan-nasidlangan sa kadasigon nga 20 km/h.
Kahapon, gin-anunsyo sang ahensya nga opisyal na nga nagsugod ang tig-ululan ukon rainy season diri sa Pilipinas lima ka adlaw matapos nila ginpahayag ang pag-umpisa sang southwest monsoon ukon habagat.
Suno sa ahensya, ang habagat nagdala sang panalagsa tubtub masami nga pag-ulan sa nagligad nga lima ka adlaw kag amo ang nangin senyales sang pagsugod sang tig-ululan sa western sections sang Luzon kag sang Visayas.
Ang mga rainfall monitoring stations nga nahamtang sa western portions sang Luzon kag Visayas amo ang ginagamit nga basehan sa pagdeklara sang pagsugod sang tig-ululan.
Kinahanglan nga indi magnubo sa pito sa 13 ka monitoring stations, ukon sobra sa 50 porsyento sini, ang makarekord sang kabug-osan nga indi magnubo sa 25 milimetro nga ulan sulod sang lima ka adlaw, kag may yara sang indi magnubo sa isa ka milimetro nga ulan sa tatlo ka sunod-sunod nga adlaw.
Kinaandan nga nagasugod ang tig-ululan sa second half sang Mayo ukon sa first half sang Hunyo kag nagapadayon tubtob Oktubre ukon Nobyembre.
Nagpaandam man ang PAGASA sa publiko nga ang nagahilapit nga El Niño nga posible magsugod sa Hunyo-Hulyo-Agosto 2026 ang mahimo magdala sang mas madamo nga ulan halin sa habagat. Posible ini bangud ang El Niño nagaapekto sa normal nga pattern sang hangin.
Ang mga bagyo mahimo man magpabaskog sang habagat.
Para sa masunod nga anum ka bulan, ukon halin Hunyo tubtob Nobyembre, nagsiling ang PAGASA nga siyam tubtob 13 ka bagyo ang posible nga maporma ukon magsulod sa PAR.
 nga ila nga gina-monitor.){kind=link}