ILOILO CITY- Nagahulat sa gihapon ang transport groups sa syudad sang Iloilo sang mangin intervention sang Department of Energy (DOE) agud nga mabuligan sila nga mapalab-ot sa Senado kag sa Kamara ang hingyo agud i-suspend ang excise tax sa mga produktong petrolyo bangud sa sunud-sunod nga pagsaka sa presyo sang gatong.
Sa interview sang Bombo Radyo kay Mr. Raymundo Parcon, presidente sang Iloilo City Loop Alliance of Jeepney Owners and Drivers Association ( ICLAJODA) kag chairperson sang Western Visayas Transport Cooperative, iya ginpahayag nga kun wala gihapon sang akto ang DOE antes matapos ang Pebrero, iduso gid sang transport group ang ila nga petition para sa fair increase sa Department of Transportation (DOTr).
Sa petition, iduso nga pasakaan ang plete sang mga commuters sang P2.50.
Ang iduso nga increase sa plete ang iga-apply sa traditional kag modernized jeepneys.
Gin-ako ni Parcon nga dako ang mangin epekto sini sa mga naga-commute apang nagapanghakroy man ang mga driver bangud indi man sila makasarang sa tuman kataas nga presyo sang gatong.
Dugang niya, nagdangop na sila kay Iloilo City Mayor Jerry Treñas agud mapalab-ot sa mga natungdan nga ahensya sang gobyerno ang ila sintemyento.
Nagpadulong man sila sa Land Transportation Franchising and Regulatory Board (LTFRB) agud ipalab-ot ang ila concern apang wala na naman sa iya opisina si LTFRB-6 Director Richard Osmeña.
