ILOILO CITY- Nagpabutyag sang pagkadismaya ang legal counsel sang Land Transportation Franchising and Regulatory Board natuhoy sa insidente sang pagpang-harass sa isa ka myembro sang LGBTG + community sa sulod sang taxi.
Ang tagreklamo amo si alyas Ken nga naghalin sa isa ka mall sa Iloilo City Proper kag nagpadul-ong sa Barangay Progreso, Lapuz, Iloilo City.
Samtang, ang driver naman amo si Leopoldo Estabillo Jr., residente sang Lambunao,Iloilo kag naga-extra sa Julix Taxi Transport Corp., sa diin nakasuksok ini sang shorts, polo kag shades base sa nakuha nga video.
Sa interview sang Bombo Radyo kay Atty. Salvador Altura, Jr., legal officer sang LTFRB Region 6, iya ginpahayag nga mas maayo kuntani nga nagpadulong sa ila talatapan ang tagreklamo antes ini ginpagwa sa media.
Sa pihak sini,gin-abi-abi naman ni Altura nga nakapadulong na sa ila talatapan ang tagreklamo.
Suno kay Altura, gilayon sila nga nag-isyu sang show cause order sa operator kag natalana ang hearing sa Hunyo 29 nga nagakadapat tambungan sang tanan nga involved apang wala pa sang kasiguruhan kun makapakita ang taxi driver.
Ginpahayag dugang sang natungdan nga bangud nakakuha ang isyu sang atensyon nagikan sa publiko, ginpakamaayo sang opisina nga magpatigayon sang motu proprio investigation.
Para kay Atty. Altura, base sa video, maathag nga may paglapas ang driver sa good moral character kag pagkamatinahuron ukon courtesy sa pasahero, kag wala man ini nakasuksok sang prescribed uniform.
Bangud diri, may yara ini sang paglapas sa rules and regulations sang franchise sa diin posible ini nga magresulta sa suspension sang driver.
Pahayag dugang sang legal counsel, itugyan sang mga ini ang imbestigasyon kag penalidad sang taxi driver sa Land Transportation Office Region 6.
