ILOILO CITY – Nagpaandam ang Land Transportation Franchising and Regulatory Board sa mga drivers sang public utility vehicles nga magapanabat gid sa tion nga madakpan nga nagapanukot sang sobra-sobra nga pamasahe.
Ini ang ginpagwa nga statement sang board matapos nga ginpakigbahin sang member sang Korean pop group nga Seventeen nga si Joshua Hong ang iya eksperyensya sang nagligad nga bulan kun sa diin, sobra ang ginsukot sa iya sang taxi driver.
Suno kay Hong, ginpabayad siya sang P1,000 nga tatlo ka beses nga mas mataas sa orihinal nga pamasahe sa taxi.
Bangud sini, nagpahanumdom ang ahensya sa tanan nga drivers nga magapangatubang sila sang violations sa idalom sang Joint Administrative Order 2014 kun sa diin, mahimo nga ma-cancel ang certificate of public convenience kag may bayaran pa nga penalty.
Indi ini ang una nga tion nga may foreigner nga nagreklamo sa overcharging sang taxi drivers sa pungsod.
Sang 2018, ang food vlogger nga si Mikey Chen kag ang iya mga upod ang ginsukot sang taxi driver sang P2,300 halin sa Ninoy Aquino International Airport Terminal 3 padulong sa Terminal 4.
