ILOILO CITY – Wala sang may ginapasin-o ang Land Transportation Office (LTO) kun colorum nga Public Utility Vehicle (PUV) ang pagahambalan.
Sa interview sang Bombo Radyo kay Riza Otayde, tagpamaba sang LTO-6, iya ginpahayag nga subong nga Semana Santa, padayon ang deployment sang ila personnel sa mga pabpubliko nga transport terminal sa Western Visayas agud nga mapahibalo kag mapahangop ang mga driver kag pasahero agud nga makalikaw sa aksidente.
Isa sa ginatutukan sang LTO amo ang pagtapna sang colorum nga nga PUV sa diin may pila na ka mga salakyan nga gin-impound ang ahensya.
Ang mga ‘violator’ ang magabayad sang P200,000 nga pina kag nakadepende naman sa Land Transportation Franchising and Regulatory Board (LTFRB) kun bala iga-suspende ukon bawi-an sang prangkisa ang kompaniya nga may yara sang colorum nga salakyan.
Kun makabayad sang pina, mahimo nga ibalik sang LTO ang driver’s license sang driver samtang kapin sa tatlo ka bulan pa bag-o makuha sang tag-iya ang gin-impound nga salakyan, depende sa kadasigon sang pagdesisyon sang LTFRB tuhoy sa prangkisa sini.
