Nagpasalamat si Undersecretary Jed Patrick Mabilog sa statement ni Department of the Interior and Local Government (DILG) Secretary kag National Police Commission (Napolcom) chairperson Jonvic Remulla nga biktima lamang siya sang drug war sang nagligad nga administrasyon.
Sa interview sang Bombo Radyo kay DILG Undersecretary Mabilog subong nga adlaw, Septyembre 11, iya ginpahayag nga ang amo nga pahayag ni Remulla amo ang bunga sang findings sang imbestigasyon sang awtoridad.
Suno kay Mabilog, ang DILG nga amo ang naga-uyat sang intelligence kag kapulisan, amo mismo ang nakakita nga wala siya sang involvement sa iligal nga droga.
“Ang iya to nga statement is the result of the findings of their investigation, kag nakita man nila nga I am one person nga never gid ako na-involve sa illegal drugs,” suno kay Mabilog.
Matandaan nga sang nagbisita si Remulla sa Police Regional Office (PRO) 6 sang Myerkules, Septyembre 9, naghimo ini sang pronouncement nga nabiktima lang si Mabilog sang polisa sang nagligad nga administrasyon sa drug war.
Suno kay Remulla, gin-gamit sang una sang Duterte administration ang war on drugs agud nga lagson ang ila mga kaaway sa pulitika, kag ang amo nga kampanya suno sa tiglikom amo ang nag-resulta sa pag-tag kay Mabilog bilang drug protector.
Natabo ang pag-link kay Mabilog sa iligal nga droga sang siya pa ang mayor sang Iloilo City.
Bangud sadto, nagbiya siya sa pungsod sang 2017, nagpabilin abroad sa malawig nga mga tinuig, tubtub nga nagbalik sa Pilipinas sang Septyembre 2024, kag nangin isa sa mga testigo sa hearings sang quad committee sa Kamara kaangot sa kontrobersyal kag maduguon nga Duterte drug war.#
