Preparado na ang Public Safety and Transportation Management Office (PSTMO) may kaangtanan sa pagpatuman sang Department of Public Works and Highways kag Iloilo City District Engineering Office sang pila ka mga reconstruction kag rehabilitasyon sa pila ka porsyon sang Jaro, Lapaz kag Iloilo City Proper.
Sa interview sang Bombo Radyo Iloilo kay Mr. Jeck Conlu, pinuno sang PSTMO, iya ginpahayag nga may mga tinawo na ang iya talatapan nga ginpaidalom sa training agud maggiya sa mga motorista sa mga alternatibo nga ruta agud makalikaw sa traffic congestion sa mga apektado nga area.
Suno kay Conlu, iya naman naistorya ang mga transport groups sa syudad nga lubos nga maapektuhan sang mga proyekto.
Ginpaandaman naman sang natungdan ang mga kontraktor sang nasambit nga mga proyekto nga tapuson ini sa natalana nga petsa.
Natalana naman nga magpagwa sang traffic advisory ang PSTMO agud magiyahan ang mga motorista.
Nahibaluan nga lakip sa sini nga mga proyekto amo ang masunod:
1.Reconstruction to Concrete Pavement along Iloilo Capiz Rd (Old Route) gikan sa San Jose School pakadto sa RCBC Jaro nga magaumpisa sa Hulyo 16, 2019 tubtob Abril 2,2020
2.Reconstruction to Concrete Pavement along Mandurriao-Jaro Road sa El 98, umpisa Hulyo 22,2019 tubtob Setyembre 19, 2019
3.Construction of Concrete Road-Concreting of Democracia St, Jaro umpisa Hulyo 15,2019 tubtob Agusto 31,2019
4.Reconstruction to Concrete Pavement on specific locations along Iloilo- Jaro Diversion Road umpisa Hulyo 19,2019 tubtob Oktubre 10,2019
5.Rehabilitation/ Major Repair of Forbes Bridge sa Lapaz umpisa Hulyo 16,2019 tubtob Agusto 20,2019
