ILOILO CITY – Ginmanduan ni Iloilo City Mayor Jerry Treñas ang mga punong barangay kag Barangay Health Emergency Response Team sa syudad nga hugot nga i-imonitor ang mga pumuluyo nga bag-o lang nag-abot nagikan sa Metro Manila.
Ini matapos nga nagpapanaug sang order ang Department of Health nga kabigon na ang amo nga mga pumuluyo bilang Persons Under Monitoring ukon PUM bangud sa mataas nga numero sang positibo nga kaso sang coronavirus disease 2019 sa Metro Manila.
Sa interview sang Bombo Radyo kay kay Treñas, iya ginpahayag nga dapat siguraduhon sang mga opisyal sa tagsa ka barangay nga magapaidalom sa voluntary quarantine ang amo nga mga pumuluyo sa sulod sang 14 ka adlaw.
Ginsuspinde man ni Treñas ang pagpatigayon sang libre nga sine para sa mga senior citizens sa syudad.
Suno sa alkalde, talalupangdon nga mahina na ang immune system sang mga tigulang kag dapat sila nga protektahan batok sa cotronavirus disease 2019.
Ginhingyo man ni Treñas ang mga senior citizens nga magpabilin na lang anay sa ila mga balay kag maglikaw sa pampubliko nga lugar.
Liwat man nga nagpangabay ang alkalde sa mga estudyante nga magpabilin sa ila mga balay samtang suspendido ang ila mga klase.
Suno kay Treñas, ipaiway anay ang pagkadto sa mga mall, bar, coffee shops, kag iban pa nga mga establishemento.
Sa baylo suno kay Treñas nga maglagaw, nagakadapat lang nga magtuon agud handa man sa liwat nga pagbukas sang klase.
Liwat nga gin-athag ni Treñas nga ‘extraordinary’ na kun kabigon ang sitwasyon sa pungsod bangud sa nagataas nga numero sang infected sang nasambit na nga global pandemic.
