ILOILO CITY- Ginakabig sang grupo nga IBON Foundation nga isa ka dako nga ‘luho’ lamang sang gobyerno ang Maharlika Investment Fund bill nga sa subong pirma na lamang ni Presidente Ferdinand Marcos Jr. ang ginahulat agud mangin layi.
Sa interview sang Bombo Radyo kay Mr. Sonny Africa, executive director sang IBON Foundation, iya ginpahayag nga ang pila ka mga opisyal sang gobyerno lamang kag mga cronies sang Marcos administration ang makapanginpulos diri.
Suno kay Africa, kwestyonable ang nasambit nga hagna kun mangin layi bangud yara sa tunga sang financial crisis ang pungsod kag sa pagkamatuod, wala gani sang bastante nga pondo para sa mga programa sang gobyerno.
Dugang pa ni Africa,kun may bastante gid man nga kwarta ang gobyerno, wala dapat ini nagakuot lang sang kwarta halin sa government financial insitututions kag corporations pareho sang Land Bank of the Philippines, Development Bank of the Philippines kag Philippine Amusement and Gaming Corporation agud himuon nga seed capital.
Ang mas maayo suno sa iya nga himuon sang gobyerno amo nga kuhaan sang tax ang mga bilyonaryo sa pungsod agud amo ang gamiton sa Maharlika Fund.
