Ginduso sang Makabayan bloc sa Kamara nga magpatigayon sang congressional inquiry sa natabo nga hostage-taking kay former senator Leila de Lima sa sulod sang Philippine National Police Custodial Center sang nagligad nga Domingo sang aga.
Ang nagduso amo sanday House Assistant Minority Leader Arlene Brosas sang Gabriela, House Deputy Minority Leader France Castro sang ACT Teachers, kag Raoul Manuel sang Kabataan sa idalom sang House Resolution 473 kun sa diin ginahingyo ang House public order and safety committee nga magpatigayon sang pagpangusisa.
Suno sa mga mamalidha, importante nga maid-id nga maimbestigaran ang amo nga hostage-taking incident ilabi na bangud isa ka maximum security facility ang Philippine National Police Custodial Center kag yara pa mismo sa headquarters.
Sa amo nga resolution, ginsulit man sang mga mamalidha ang ila panawagan nga paguwaon si de Lima bangud yara sa risgo ang iya nga safety bisan yara siya sa sulod sang detention center.
Domingo sang aga sang nagtuyo ang tatlo ka Abu Sayyaf members nga magpalagyo gikan sa Custodial Center paagi sa pagbuno sa isa ka pulis nga nagserbe sang ila pagkaon.
Duha sa ila ang natiruhan kag napatay samtang ang isa naman ang nagdalagan sa detention cell ni De Lima kag gin-hostage ang anay senador.
Patay man ang amo nga inmate matapos gintiro man sang pulis. ##
