Ginpanindugan sang Malacañang nga dapat manabat sa ila mga binuhatan ang bisan sin-o nga may sala — bisan ano man ang ila nga ila political affiliation ukon bisan pa nga may personal nga relasyon kay President Ferdinand Marcos Jr.
Ini ang pahayag ni Palace Press Officer Undersecretary Claire Castro matapos magpasaka sang plunder case ang Office of the Ombudsman batok sa anay House Speaker Martin Romualdez.
Pakaisa ni Romualdez si Marcos.
Suno kay Castro, kun sin-o ang dapat manabat, kinahanglan manabat bisan pa kun ini isa ka himata, abyan, kaalyado ukon kaaway sang presidente sa pulitika.
“Sa Pangulo naman po ay kung sino po ang dapat na managot ay dapat na panagutin. Kung sino man po ‘yan– kamag-anak, kaibigan, kaalyado, o kalaban sa pulitika– kung ano po ang isinisigaw ng ebidensya, dapat lamang po itong mailahad,” suno kay Castro sa press briefing.
Ginpahayag niya nga dapat ipakita ang mga ebidensya kag ang mga ginapakita sini amo ang dapat mangin basehan sa kaso.
“So, depende na po yan sa mga makakasuhan kung sila naman po ay may sapat na ebidensya para ipaglaban ang kanilang sarili, nasa kanila na po iyan,” dugang niya.
Ginklaro man ni Castro nga ginatahod sang Malacañang ang tikang sang Office of the Ombudsman.
Samtang, sang ginpamangkot kun nasubuan ukon nadismaya si Marcos sa kaso batok kay Romualdez, ginpahayag ni Castro nga wala pa niya napamangkot ang Presidente kaangot sa iya personal nga reaksyon sa sini nga butang.
Matandaan nga sa iya State of the Nation Address (SONA), ginmensyonar ni Marcos si Romualdez sa imbukada pa lang sang iya speech kun sa diin gin-anunsyo niya nga malapit na lang ipasaka ang kaso.
Sini man nga adlaw, inoras lang matapos nga gin-file sang Ombudsman ang kaso, nagguwa ang arrest warrant halin sa Sandiganbayan kag ginserbe kay Romualdez nga yara subong sa ospital.#
