Nagpahilabot na ang Malacañang sa isyu sang makatilingala nga pagkadula sang masobra 30 ka mga manugbulang.
Nagmandu ang palasyo nga imbestigaran ang gina-alegar nga abduction.
Sa memorandum nga napetsahan sang Marso 8 subong nga tuig, nagmandu si Executive Secretary Salvador Medialdea sa Department of the Interior and Local Government (DILG), National Bureau of Investigation (NBI), kag sa Philippine National Police (PNP) nga magpatigayon sang maid-id nga imbestigasyon agud mahibaluan kun ngaa nagkaladula ang mga manugbulang kag isumite ini nga report sa Office of the President kag sa Department of Justice sa sulod sang treinta ka adlaw halin sang gin-release ang memorandum.
Ginmanduan man ni Medialdea ang Philippine Amusement and Gaming Corporation (Pagcor) nga lantawon kun may mga bayolasyon ang online cockfight licensees kag pasiguraduhon man kun natuman gid man ang security kag ang surveillance requirements.
Ang mandu sang opisina ni Executive Secretary Medialdea ang kasunod sang Senate Resolution 996 kun sa diin nakasaad ang panawagan sang mga mamalidha sa Malacañang nga isuspinder ang mga operasyon sang e-sabong bangud wala pa man na-resolbar ang isyu sa nagkadadula nga mga manugbulang.
