Nagsaka na sa 48 ang patay kag masobra 150 ang pilason sa suicide bombing sa mosque nga nahamtang sa isa ka police compound sa Peshawar sa Pakistan.
Sa inisyal nga report, mga pulis kag security officials ang kalabanan nga nagkalamatay.
Indi pa subong maathag kun paano napalusot sang Taliban nga suspek ang iya dala nga bomba sa amo nga compound kun sa diin yara man mismo ang police headquarters kag ginakabig high-security zone.
Natabo ang pagsigabong sa sulod sang mosque kun sa diin nagapangamuyo ang ginapahayag masobra 300 ka worshippers lakip na ang personnel sang police kag army and bomb disposal squad.
Ginpahayag nga yara ang bomber sa una nga row sang ginpalupok sini ang bomba.
Nag-collapse ang atop gani nadugayan pa ang rescuers nga makuha ang mga debris nga nagtabon sa iban nga mga biktima.
Sunod nga gin-ako sang Pakistani Taliban nga ila grupo ang responsable sa amo nga krimen.
Suno sa duha ka opisyal sang Pakistani Taliban ukon mas kilala nga Tehreek-e-Taliban, gintimalos sang ila grupo ang pagpatay sa militant commander nga si Khalid Khorasani sang nagligad nga tuig sa Afghanistan.
Ang grupo nga Tehreek-e-Taliban isa ka United States-designated foreign terrorist organization nga naga-operate sa Afghanistan kag Pakistan.
Separado ini sa Afghan Taliban apang ginapahayag nga suod nga magkaalyado. ##
