MANILA – Posible nga coronavirus disease 2019 (COVID-19) ang kabangdanan sang kamatayon sang isa male detainee sa Metro Manila.
Suno kay Bureau of Jail Management and Penology (BJMP) spokesperson Jail Chief Insp. Xavier Solda, apisar ‘heart ailment and hypertension’ ang ginatudlo nga nagapanguna nga rason kun ngaa napatay ang amo nga lalaki, nakabutang sa iya death certificate ang “other conditions contributing to his death is possible COVID-19 infection”.
Suno kay Solda, indi mahimo nga pabay-an na lang ang amo nga impormasyon bangud daku ang epekto sini sa iban nga mga inmates.
Ginpasalig sang natungdan nga wala sang untat ang panikasog sang BJMP agud nga maka-establisyar sang isolation center sa gwa sang jail facility.
May ginpatigayon man nga contact tracing kag nadiskubrehan nga 17 pa ka mga detainees ang nagakinahanglan sang isolation agud matatapan ang kondisyon.
Dugang pa sang natungdan, ang COVID-19 isolation center sang BJMP nga yara sa Quezon City ang nakompleto na bangud sa suporta sang International Committee of the Red Cross kag sang Philippine Red Cross.
Ang amo nga pasilidad ang may yara sang 48-bed capacity kag magatatap sang tanan nga presuhan sa Metro Manila.
Nahibaluan nga una naman nga ginpahayag ni Chief Jail Director Allan Iral nga istrikto ang implementasyon sang precautionary measures kaangay sang physical distancing, pagsuksok sang face masks, kag pag-disinfect sa mga presuhan.
