ILOILO CITY – Indi na mandatory ang pagsuksok sang face mask sa mga lugar kaangay sang public transportation kag hospitals kasunod sang pagbawi ni President Ferdinand Marcos Jr. sa COVID-19 emergency sa pungsod.
Gindeklarar ni Marcos nga optional lamang ang pagsuksok sang face mask sang Oktubre sang nagligad nga tuig pinaagi sa Executive Order No. 7, magluwas lamang sa mga lugar kaangay sa ospital, mga ambulansya, kag public transportation.
Sang Byernes, nag-issue si Marcos sang Proclamation No. 297 nga nagasiling nga ang tanan nga order, memoranda, kag issuances nga epektibo lamang sa State of Public Health Emergency ang kanselado na kag indi na epektibo.
Suno kay Health Secretary Ted Herbosa, ang pagsuksok sang face mask sa public transportation kag sa iban nga settings nga gin-specify sa Executive Order No. 7 ang makabig nga kanselado kun basehan ang technical standpoint.
Pahayag niya, ang tanan nga ginpatuman nga medical protocols ang ginbawi naman magluwas lamang sa Emergency Use Authorization may kaangtanan sa mga bakuna kag balayran sang outstanding dues para sa Health Emergency Allowance.
Ini ang gin-extend sang isa ka tuig agud nga maubos ang bakuna.
Suno sa Department of Health, ang Inter Agency Task Force ang magasapol para sa isa ka final meeting agud pormal nga matapos ang public health emergency kag magadihon sang kumprehinsibo nga report.
Ini ang maga-unod sang mga tikang kag dedikasyon sang task force, sang medical frontliners, sang bilog nga gobyerno nga nagpakig-away batuk sa mga pagtilaw dala sang pandemya.
