Ginakwestyon ni Senator Rodante Marcoleta kun ano ang awtoridad ni former Senator Antonio “Sonny” Trillanes IV kun ngaa nagkadto ini sa Senado sang nagligad nga Lunes sang hapon, Mayo 11, agud magserbe sang arrest warrant batok kay Senator Ronald “Bato” dela Rosa.
Halin sa International Criminal Court (ICC) ang amo nga arrest warrant.
Indi kumporme si Marcoleta sa sabat ni Trillanes nga gintuman lang niya ang pagpanghangkat anay sa iya ni Bato nga bisan siya pa ang ma-posas sa iya kun ara na ang arrest warrant. Kaangot ini sa nangin statement ni Bato sang 2024 nga “Go ahead! Make my day, Mr. Trillanes!”
Una, ginsukmaan pa ni Marcoleta ang media kun ngaa wala ginpamangkot kay Trillanes kun ngaa siya ang maserbe sang arrest warrant. Sang nagsabat ang reporters kun ano ang paathag ni Trillanes, diri na kag naghirit si Marcoleta: “Kung sinabi ni Bato kumain siya ng t*e, kakain siya ng t*e?”
Matandaan nga si Trillanes ang nagpakita sang kopya sang ICC arrest warrant sang Lunes pagkatapos nagkuyampad sa pagdalagan si Dela Rosa bangud sang paglagas sang National Bureau of Investigation (NBI) agents.
Pila ka oras ang nagligad matapos sadto, ginkumpirma man sang ICC nga ginpagwa matuod sang Pre-Trial Chamber I ang arrest warrant sang nagligad pa nga Nobyembre 2025 kag gin-unseal subong lang nga Mayo.
Naghatag sang protective custody ang Senado kay Dela Rosa, apang nagpalagyo ini sang Huwebes sang kaagahon, Mayo 14.#
