Ginmanduan ni President Ferdinand Marcos Jr. si Interior Secretary Jonvic Remulla nga ibalik sa Pilipinas ang pugante nga si Zaldy Co “at all costs” ukon sa bisan ano nga paagi.
Suno sa tiglikom, nahibaluan na sang mga awtoridad kon diin yara si Co sa France, pati ang iya address kag balay.
Pahayag sini, magakadto siya sa France agud masiguro nga makapagwa ang Interpol sang Red Notice batok kay Co nga ginreport nga nagapangayo sang asylum sa amo nga pungsod.
“That’s the agenda, that’s the agenda. Zaldy Co is the agenda … we know where he is, we know the address, we know his house. It’s to get him back here,” suno sa tiglikom.
“The truth and the law are behind us and I think we can conclusively prove that once the warrant of arrest is in order,” dugang niya.
Samtang, ginkwestyon naman ni Kalookan Cardinal Pablo Virgilio David si Remulla bangud sa iya pagsugid sa publiko parte sa plano niya nga magkadto sa France agud pangitaon si Co.
“I find this rather baffling. If you are seriously trying to locate and arrest a fugitive, why announce to the media where you are going to look for him?,” pamangkot ni Cardinal David.
Suno kay David, indi dapat ipahibalo sa publiko ang masunod nga tikang sa pagpangita sa isa ka pugante bangud mahimo ini makahatag sang kahigayunan sa pugante nga makapalagyo sa mga awtoridad.
Antes sini, nagsiling man si Ombudsman Jesus Crispin Remulla nga makadto man siya sa France agud makigsugilanon sa mga lokal nga awtoridad batok sa paghatag sang sanctuary sa mga personalidad nga may kaso ukon ginaiimbestigahan sa Pilipinas, lakip sanday Co kag Senator Loren Legarda.
Si Co nagaatubang sang duha ka kaso sang malversation sa Sandiganbayan, samtang si Legarda naman ang nagapangatubang sang ginpasaka nga plunder complaint sa Office of the Ombudsman.
“Announcing your next move in a manhunt is practically an invitation to the fugitive: Don’t go to France. There is a difference between keeping the public informed and keeping the person you are pursuing informed,” pahayag pa ni Cardinal David. “Sometimes effective law enforcement requires less publicity and more intelligence.”
