Ginduso ni President Ferdinand “Bongbong” Marcos Jr. ang food security paagi sa production sa session sa nutrition security nga ginpatigayon sa World Economic Forum sa Davos, Switzerland.
Gin-suggest sang presidente nga pasangkaron pa ang produksyon sa agriculture kag fisheries kag pauswagon pa ang pag-promote sang production bisan sa non-agricultural areas kaangay sang urban kag vertical farming amo man ang community gardening.
Bilang tiglikom man sang Department of Agriculture (DA), ginpahayag ni Marcos nga ang pagkaon nga gintanum gid ukon ginpatubo gamit ang kaugalingon nga kamot ang pinaka-kinahanglan agud mahatagan sang nutrisyon ang lawas.
Gin-cite pa sini ang 2021 Global Food Security Index kun sa diin pang-64 ang Pilipinas sa 113 ka mga pungsod sa apat ka dimensyon sang food security metrics.
Ginpabugal man sini nga ang prayoridad nga mga intervention sa Pilipinas amo nga himuon nga available ang pagkaon kag accessible sa tunga sang ginapangatubang nga global food kag energy shortage.
Matandaan nga antes ang pag-umpisa sang World Economic Forum, todo-depensa si Marcos sa pag-import sang bombay sa pungsod bangud wala na sang choice ang gobyerno suno sa iya.
Una na sini ginpahayag nga nagapangita sang paagi ang iya nga administrasyon agud nga mapasangkad ang production sang bombay kag iban pa nga produkto agud nga malikawan ang padayon nga pag-import. ##
