Nakabalik na si President Ferdinand ‘Bongbong’ Marcos, Jr. sa pungsod Pilipinas matapos ang iya ginpahayag “madinalag-on” nga 40th kag 41st Association of Southeast Asian Nations (ASEAN) summits sa Cambodia.
Nag-abot si Marcos, ang iya Gabinete, kag pila pa ka Philippine delegates pasado ‘las dose sa tungang gab-i.
Antes nagbalik diri sa pungsod, nagpakigkita pa ang presidente sa Filipino community sa Cambodia nga amo ang katapusan nga iya nga gintambungan nga event sa apat ka adlaw nga trip sa amo nga pungsod.
Suno sa presidente, daku ang iya nga pasalamat sa kontribusyon sang Filipino community sa Cambodia sa pag-uswag sang Pilipinas kag mangin sa pag-umwad sang Cambodia bangud kabahin sila sang reconstruction sang amo nga pungsod.
Samtang, ginpahayag pa ni Marcos nga nangin madinalag-on ang iya nga byahe bangud nakaistorya ini sa iban nga mga lider kag na-diskusyunan ang mga isyu nga nagaapekto sa Southeast Asia.
Lakip sa nakaupod ni Marcos sa bilateral discussions amo sanday Cambodian Prime Minister Hun Sen, ang Sultan sang Brunei, ang President sang Republic of Korea, ang Prime Minister sang Vietnam, kag ang Prime Minister sang Canada.
Sa related summits, naistoryahan naman ang regional issues kaangay sang magamo nga sitwasyon sa Myanmar, developments sa West Philippine Sea Sea, ang krisis sa Ukraine, ang application sang Timor-Leste sa ASEAN membership, kag madamo nga iban pa.
Nadiskubrehan man sini nga palareho ang problema sang mga pungsod sa Southeast Asia.
Halimbawa diri amo ang presyo sang abono kag langis kag supply side problems.
Ang food security amo suno sa iya ang isa sa pinakadaku nga pagpanghangkat.
