GUIMARAS- Ginakwestiyon sa gihapon sang Local Government Unit sang Guimaras ang ginaduso sang Maritime Industry Authority nga steel hull ukon fiber glass nga desinyo para sa modernisasyon sang mga motorbanca nga nagabyahe Iloilo-Guimaras and vice versa.
Ini apisar nga kumpirmado na nga madayon ang pag-ilis sang mga pumpboats gikan sa wooden hull kag himuon nga steel hull ukon fiber glass.
Sa interview sang Bombo Radyo kay Buenavista, Guimaras Mayor Eugene Reyes, iya ginpahayag nga sa ginpatigayon nga pagsinapol nga ginpatawag sang Maritime Industry Authority kag gintambungan sang mga opisyales sang Guimaras, ginpamangkot ni Vice Governor John Edward Gando ang Maritime Industry Authority kun may pagtuon nga makapamatuod nga ang wooden hull nga desinyo sang pumpboat ang kabangdanan sang pagkulob sang mga ini sang natabo nga Iloilo Strait tragedy apang wala nakasabat ang Maritime Industry Authority.
Sa subong suno kay Mayor Reyes, ginahingyo nila ang maathag kag malawig nga timeline nga ihatag sang Department of Transportation kag Maritime Industry Authority para sa pag-ilis sang desinyo sang motorbanca bangud nagakinanglan ini sang dako nga kantidad nga nagabalor sang P5 million tubtob P7 million pesos.
