Lauman nga mas daku ang Balikatan exercises nga patigayunon subong nga tuig.
Ang Balikatan amo ang tuigan nga joint military drills sang Armed Forces of the Philippines (AFP) kag sang United States Armed Forces.
Suno kay Philippine Army chief Lt. Gen. Romeo Brawner, Jr., ini posible ang pinakadaku nga bilateral exercise sa tunga sang armadong kusog sang duha ka pungsod halin sang 2015.
Magatutok ini indi lamang sa pag-develop sang war-fighting capabilities kundi pati sa non-traditional roles kaangay sang humanitarian assistance kag disaster response.
Suno pa kay Brawner, ang exercises nga himuon sa Abril tubtub Hunyo ang sabat sa “man-made” kag “natural” nga pagpamahog.
Sini lang nga Martes, ginpatawag ni President Bongbong Marcos ang ambassador sang China bangud sa “serious concern” sa intensidad sang mga aktibidad sang China sa West Philippine Sea.
Ang latest nga natabo amo ang paggamit sang Chinese Coast Guard sang laser batok sa Philippine Coast Guard — tikang nga ginpangapinan sang Chinese foreign ministry kag gintawag nga legal.
Ginsuportahan naman sang Australia, Japan, kag United States ang Pilipinas kag gin-call out ang China sa amo nga hitabo.
Sang nagligad nga tuig, matandaan nga 8,900 ka Filipino kag American servicemen kag 40 observers halin sa Australian Defence Force ang nagtambong nga amo ang ginapahayag pinakamataas nga numero sang participants. ##
