Nag-deploy na ang militar sang Thailand sang warships kag helicopters agud pangitaon ang 33 ka mga marino nga na-missing matapos naglugdang ang warship nga may sakay nga masobra 100 ka mga crew sa Gulf of Thailand.
Suno sa Thai Navy, matapos naglugdang ang His Thai Majesty’s Ship Sukhothai, 75 pa lang ka sailors ang natigayon nga na-rescue.
Magluwas sa search operation,may ginpatigayon man nga imbestigasyon kun ano ang rason sang insidente.
May video ang Navy kun sa diin makit-an ang crew members nga napangputos sa mga habol, ginabulong, samtang gin-airlift naman ang iban pakadto sa ospital.
Santo sa inisyal nga impormasyon gikan sa Navy, una nga nasudlan sang tubig ang hull sang barko kag na-short-circuit ang power room.
Bangud nadulaan na sang kuryente, nadulaan man ang crew sang kontrol sa barko tubtub nga dalayon nga naglugdang.
Nahibaluan nga naga-patrol ang barko 32 kilometros east sang Bang Saphan sa Prachuap Khiri Khan province sang naalangan ini bangud sa bagyo.
Tatlo ka naval ships kag helicopters ang ginpadala agud nga maghatag assistance apang warship His Thai Majesty’s Ship Kraburi lamang ang nakalab-ot sa vessel antes ini dalayon nga naglugdang.
Ini nga HTMS Sukhothai ang gintukod sa Estados Unidos para sa Thai Navy sang mid-1980s.
