ILOILO CITY – Dakop ang 110 ka mga persona sa distrito sang Jaro matapos nga naglapas sa ginapatuman nga Curfew sa syudad sang Iloilo bangud sa Enhance Community Quarantine.
Sa interview sang Bombo Radyo kay Iloilo City Police Office Director Pol Col Eric Dampal, iya ginpahayag nga lakip sa mga nagakaladakpan ang pila ka mga menor de edad kag senior citizen.
Suno kay Dampal, ginatipon nila ang tanan nga mga nadakpan agud laygayan kag usisaon kun ngaa nagalapas sila sa gihapon sa curfew apisar nga makapila na sila nga ginapahanumduman,
Dugang sang natungdan, iga turn over ang mga nagkaladakpan sa ila mga barangay official agud sila na mismo ang magpanugyan sa ila pumuluyo.
Liwat naman nga nanawagan si Dampal sa mga pumuluyo ilabi na sa mga kabataan kag senior citizen nga mag kooperar sa mga pagsulundan nga ginhatag bangud para man ini sa ila kaayuhan agud malikawan ang COVID-19
Samtang suno naman kay Mr. Jeck Conlu, pinuno sang Public Safety and Transportation Management Office, apisar nga nakapoy na sila kag mga kapulisan sa pagbantay sa mga pumuluyo magapadayon sila sa gihapon sa pagpanakop sa mga nagalapas sa mga pagsulundan ilabi na sa curfew.
Dugang sang natungdan, posible nga magapangatubang na sang naga kaigo nga kaso ang sinuman nga madakpan nga naga liho-liho sa gihapon sa dalanon apisar nga nagcurfew na.
