Nagbalibad si Senator Jinggoy Estrada nga magkomento matapos ginrekomendar sang Department of Justice (DOJ) sa Ombudsman nga kasuhan siya sang plunder, graft, kag direct bribery.
Nagguwa ang kumpirmasyon halin sa Ombudsman kadungan sang pag-convene sang Senado bilang impeachment court kahapon sang hapon, Mayo 18.
Pagkatapos sang sesyon, nagpahayag si Estrada nga wala lang siya anay sang komento kag ang mga abogado na lang niya ang pamangkuton.
“No comment… Talk to my lawyers,” suno sa senador.
Nahibaluan nga ang mga akusasyon kay Estrada ang naangot sa mga anomaliya sa flood control projects.
Suno kay Assistant Ombudsman Mico Clavano, lakip si Estrada sa mga primary respondents nga yara sa resolusyon sang DOJ.
Lakip man sa listahan si anay Department of Public Works and Highways (DPWH) Secretary Manny Bonoan, Bong Dinglasan, Engr. Denryl Caesar Cortuna, Asst. Engr Manny Bulosan, kag Engr. Arturo Gonzales Jr.
Gin-drop naman ang kaso batok kay former DPWH Undersecretary Catalina Cabral kasunod sang kamatayon sini sa Baguio City.
Wala man ang pangalan nanday Roberto Bernardo, Henry Alcantara, kag Gerard Opulencia sang DPWH sa final criminal information nga iga-file sa korte bilang kabaylo sang ila nga mga testimoniya kag mga rebelasyon.
Suno kay Clavano, nag-ugat ang rekomendasyon sa complaint nga gin-file sang National Bureau of Investigation–DOJ Public Works and Bid-Rigging Task Force.
“The allegations claim that multiple high-ranking public officials and private individuals conspired to maneuver allocations, rig public bidding processes, and siphon government funds stemming from major national infrastructure budget systems—specifically involving the National Expenditure Program (NEP), the Bicameral Conference Committee / House General Appropriations Bill (BICAM/HGAB), and the General Appropriations Act for Fiscal Year 2025 (GAA FY 2025),” kabahin sang ginbasa ni Clavano kahapon.
Matandaan nga una naman nga ginpahayag sang Ombudsman nga may mga kaso naman nga ginahanda batok kanday former Senate President Chiz Escudero kag anay House Speaker kag subong Leyte 1st District Rep. Martin Romualdez.#
