Gin-ako ni National Bureau of Investigation (NBI) Director Melvin Matibag nga ang iya asawa nga si Laguna First District Representative Ann Matibag amo ang isa sa mga kongresista nga nag-endorso sang Articles of Impeachment batok kay Vice President Sara Duterte.
Ginpahayag ini sang director sa cross-examination sa iya sang defense lawyer nga si Atty. Mark Vinluan sa ikawalo nga adlaw sang trial sa Senate impeachment court.
Apisar wala pa ini ginpamangkot sang abogado, direkta nga nag-ayo si Matibag sa presiding officer kag nagsiling nga agud makakinot na lang sang tyempo kag bangud nahibaluan sini kun diin ang direksyon sang pamangkot, nag-ako siya sa korte nga nangin endorser ang iya asawa sa articles of impeachment.
Suno kay Matibag, wala sang kaangtanan ang trabaho sang iya asawa bilang miyembro sang Kamara sa iya katungdanan bilang direktor sang NBI.
“Yes, my wife is one of the endorsers of the impeachment,” suno sa director. “However, the job of my wife as a legislator is totally detached from me, being the director of the National Bureau of Investigation,” dugang sini.
Ginpahayag ni Matibag nga nangin testigo siya sa impeachment trial matapos imbitaron sang House prosecution panel.
Dugang pa niya, base sa pre-trial order, nalakip man ang iya ngalan sa listahan sang mga posible nga testigo sang depensa kag handa man siya nga mangin witness para sa defense kun ipatawag siya sang korte.
“From my understanding, in the pre-trial order, I was also listed by the defense. I will be gladly witness for the defense as well, if I will be called upon,” pahayag sini.
Sa Mayo 11 sang sini nga tuig, 257 ka miyembro sang House of Representatives ang nagboto pabor sa pag-adoptar sang House Resolution No. 989, upod ang mga findings, conclusions, kag recommendations nga yara sa Committee Report No. 261, nga nagpasaka sang impeachment case sa Senado agud nga ipaidalom sa impeachment trial.#
