ILOILO CITY – Ginpaandaman ni Iloilo City Mayor Jerry Treñas ang mga barangay officials sa syudad sang Iloilo nga ginapahayag may pinilian sa pagpanghatag sang food packs kag relief goods sa mga pumuluyo.
Sa interview sang Bombo Radyo kay Mayor Treñas, iya ginpahayag nga madamo sya sang nabaton nga reklamo may kaangtanan sa indi patas nga pagpanagtag sang mga food packs sa mga pumuluyo kag may yara man sang wala nakabaton sa pila ka mga barangay sa syudad.
Suno kay Treñas, ginapa usisa na niya ang nasambit nga reklamo kay Liga ng mga Barangay Irene Ong.
Sa tion nga mapamatud-an nga may yara gid man sang pinilian sa pagpanagtag sang bulig, posible nga kuhaan sang poder ang isa ka punong barangay sa pag-uyat sang mga assistance nga ginahatag sang Iloilo City Government.
Ginpahayag sang alkalde nga may yara na sang isa ka punong barangay sa isa ka distrito sa syudad nga ginkuhaan sang poder bangud ginapahayag may pinilian sya sa pagpanghatag sang bulig.
Dugang sang natungdan, mahimo man nga makapadala sang reklamo ang mga pumuluyo direkta sa iya nga talatapan may kaangtanan sa nasambit nga problema.
