ILOILO CITY- Gin-aprubahan na sang Infrastructure Development Committee of the Regional Development Council Region VI ang proposed P1.782 billion nga budget para sa rehabilitasyon sa mga nagkalaguba sang naglaslas ang bagyo Paeng.
Sa interview sang Bombo Radyo kay Mayor Jerry Trenas nga amo ang chairman sang kumitiba, iya ginpahayag nga ila ini iga-endorso sa lebel sang senado, kongreso, sa Department of Public Works and Highways kag sa Office of the President.
Suno kay Trenas, ang dako nga porsyon sang budget ang magakadto sa Antique.
Dugang sang alkalde, sunod nila nga hatagan sang prayoridad kag maistoryahan sang committee amo ang paglikaw sa baha.
Nahibaluan nga kaina ginpatigayon ang meeting sang Regional Development Council- Infrastructure Committee.
Samtang sa amo man nga meeting, wala napunggan sang alkalde nga mangakig sang nahibaluan sini nga nagapabugtoy ang National Commission on Indigenous Peoples sa ginaduso nga Panay River Basin Integrated Development Project Feasibility Study.
Suno sa alkalde, nadismaya ini sa amo nga komisyon kun ngaa pila ka beses nga nga ginpabalik-balik ang papeles partikular na ang Certificate of Precondition nga dapat ihatag sang komisyon para matigayon na ang Detailed Engineering Design sa amo nga feasibility study.
Bangud sini, imbitaron ni Trenas sa masunod nga meeting ang chairman sang komisyon agud magpaathag kun ngaa ginapabudlayan nila ang pagpatuman sang amo nga proyekto nga makadul-ong sang dako nga benepisyo ilabi na sa mga pumuluyo sang Capiz.
