ILOILO CITY- Nagapati ang isa ka football coach nga makabig na nga Greatest Of All Time ang Argentinian Superstar nga si Lionel Messi.
Sa interview sang Bombo Radyo kay coach Domingo Subo, iya ginpahayag nga ang kadalag-an sang Argentina sa World Cup amo ang nagasabat sang pamangkot kun sin-o gid man nga football star ang makabig Greatest Of All Time.
Suno kay Subo,nakompleto na ni Messi ang tanan nga mga championship trophies sa iya career gani nagakabagay lamang nga ihatag sa iya ang amo nga titulo.
Ini ginalakipan sang 10 ka La Liga titles, pito ka Copa del Rey titles ,apat ka Union of European Football Associations Champions Leagues, 2021 Copa América title kag ang 2022 FIFA World Cup title.
Gindugang naman ni Subo nga magluwas kay Messi, dapat man kilalahon ang kontribusyon sang iya mga kaupdanan sa team kun ngaa naangkon sang Argentina ang World Cup title nga ulihi nadaugan sang pungsod sang 1986.
