Nagadangat sa 46 ka mga Punong Barangay ang pasakaan sang kaso sang Department of Interior and Local Government (DILG) bangud sa pagpangampanya sa mga kandidato nga nagapadalagan sa national kag local elections.
Sa interview sang Bombo Radyo kay DILG Undersecretary Epimaco Densing III, iya ginpahayag nga santo sa ginpirmahan nga joint memorandum sang Commission on Elections (Comelec) kag sang Civil Service Commission (CSC), hugot nga ginadumilian ang mga civil servants nga mapangampanya sa mga kandidato.
Nagpanawagan man si Densing sa publiko nga gilayon nga i-report sa DILG ang mga barangay officials nga maaktuhan nga nagapangampanya.
Suno kay Densing, mahimo nga kuhaan sang picture kag video ang mga barangay officials nga nagapangampanya.
Ini ang mahimo nga ipadala sa email sang DILG nga bantaykorapsyon.dilg@gmail.com kag nagakadapat nga butangan sang caption, petsa kag lugar.
Gin-athag sang opisyal nga ang 46 ka mga barangay officials nga pasakaan sang kaso ang kabahin pa lang sang 1st batch kag madamo pa sila sang mga pasakaan sang kaso.
Ang nasambit nga mga barangay officials ang naghalin sa Quezon City, Taguig, Misamis Oriental kag Parañaque.
