Natumod sang mga opisyal sa Barangay Calumpang, Molo, Iloilo City nga mga menor de edad ang may kahimuan sa pagpangbangga kag pagpanghaboy sang bato sa amo nga barangay.
Lain-lain nga reklamo ang nabaton sa barangay kaangay sang pagsulod sang grupo sang mga bata sa compound, pagpang-gyera sang bato, kag paglambat sa iban nga mga tawo nga nagalabay.
Ginapahayag nga mas malala pa kun kaisa bangud may bitbit pa sila nga mga kutsilyo bangud sa ila ‘tripping’.
Sa interview sang Bombo Radyo kay Punong Barangay Roberto Niño, iya ginpahayag nga ginapaidalom na sa diversion kag intervention program ini nga mga bata agud nga malikawan ini nga malain nga batasan.
Suno pa kay Niño, napatawag naman sang barangay social worker ang ila ginikanan.
Dugang pa, may gin-deploy man nga mga barangay tanod sa lugar agud nga malikawan ang insidente sang pagpangbangga sa mga maligwin nga area.
Bangud menor-de-edad suno sa punong barangay, indi man basta-basta nga pangpuguson ini nga mga indibidwal kundi gina-amat-amat lang tudlo paagi sa diversion kag intervention program.
