ILOILO CITY- Naapektuhan ang source of water ukon bubon sang pila ka mga pumuluyo nga malapit sa Ungka Flyover matapos ang ginhiwat nga jet grouting sa piers 4, 5 kag 6.
Ang jet grouting nga isa ka pamaagi sang soil stabilization nga naga-involve sang pag-inject sang stabilizing fluid sa idalom sang duta nga ginpatigayon sa lugar ang may kaangtanan sa pag-usmod sang flyover.
Sa interview sang Bombo Radyo kay Ex-Officio Board Member Ramon Sullano, Presidente sang Philippine Councilors League Iloilo Chapter, iya ginpahayag nga pagkatapos ang jet grouting nga ginhimo sang International Builders Corporation, wala na sang tubig nga nagaguwa ukon nahubsan na ang pila ka mga bubon sa lugar.
Una na diri nga ginpahayag sang Ilonggo nga structural engineer nga si Engineer Nilo Jardeleza, may yara sang body of water ukon unconfined acquifer ukon tubig sa idalom sang layer sang duta kag kun mayyara sang gina-introduce nga butang sa aquifer, ini ang makontaminar.
Matandaan nga nadiskusyunan sa committee hearing sa Sangguniang Panlalawigan nga kun himuon ang jet grouting, dapat makuha anay sang permit sa Department of Environment and Natural Resources kag sang ginpamangkot ang tiglawas sang kontraktor,wala sila makasabat kun naka-secure gid man sila sang permit.
Sa hearing, ginpamangkot man ni 2nd District Senior Board Member June Mondejar ang Department of Public Works and Highways kun ano ka epektibo ang ginhiwat nga jet grouting kag nagsabat si DPWH -6 Director Nerie Bueno nga indi ini permanente nga solusyon sa problema, sa baylo temporaryo lamang ini agud mauntat ang pag-usmod.
