Gin-athag sang Bureau of Customs (BOC) nga kun dal-on pasulod sa Pilipinas ang mas barato nga vegetables nagikan sa iban nga mga pungsod, nagakinahanglan gid ini sang clearance halin sa Bureau of Plant Industry (BPI).
Pareho lang ang pagsulundan suno sa Customs sa sibuyas — apisar personal nga kinahanglanon ukon bisan ibaligya.
Kinahanglan ang clearance suno sa ahensya — apisar damo man ukon gamay ang dala nga produkto.
Gin-anunsyo ini sang ahensya kasunod sang nakit-an nga mga impormasyon nga nagabalon pauli ang Filipino travelers kag migrant workers sang bombay bilang pasalubong sa ila nga pag-abot sa Pilipinas sa baylo nga magdala sang mga tsokolate kag iban pa nga naandan nga mga delicacies.
Ini bangud tuman ka mahal ang bombay sa pungsod nga nagalapaw pa sa P400 sa pila ka mga areas.
Suno naman sa customs officials, kinahanglan anay nga mag-apply para sa Plant Quarantine Clearance kun personal nga gamiton ang dala nga vegetables; samtang dapat naman mag-apply para sa Sanitary kag Phytosanitary Import Clearance kun ibaligya ang produkto.
Antes pa man ang anunsyo sang BOC, gin-kwestyon na sang pila ka mga senador ang ginapahayag double standard sang ahensya kun paghambalan ang pagdakop sang mga nagapasulod sang bombay sa pungsod.
Kasunod ini sang natabo sini lang nga Enero 10 kun sa diin 10 ka crew members sang isa ka airline company ang nabutang sa konrobersiya bangud sang pagdala sang sibuyas sa Pilipinas bilang “pasalubong”.
Ginapahayag nga nakuha gikan sa cabin crew sang Flight PR 659 halin sa Dubai ang 15.5 kilos sang sibuyas, 4.5 kilos sang lemons, kag isa ka kilo sang strawberries kag blueberries.
Suno sa Bureau of Customs, ginlapas sang crew members ang Plant Quarantine Law of 1978 bangud sa kakulang sang phytosanitary certificate, paglapas sa Presidential Decree 1433 bangud sa kakulang sang plant quarantine clearance kag paglapas sa Section 1404 sang Customs Modernization and Tariff Act bangud sa “failure to declare the produce.”
Ginrekomendar sang bureau ang confiscation sang goods kag ang nagakaigu nga legal action.
Sa hearing sang Senate committee on agriculture, food, and agrarian reform hearing, sanday Senador JV Ejercito kag Raffy Tulfo ang nagpahayag nga “double standard” ang pagsilot sa crew members samtang ginapabay-an naman ang major smugglers.
Suno kay Tulfo, pasalubong lang ang dala sang crew members, apang indi niya mahangpan kun ngaa ginapabay-an man sang Customs ang mga big-time smugglers. ##
