“My power’s really low, so this may be the last image I can send. Don’t worry about me though: my time here has been both productive and serene.”
Ini na ang posible katapusan nga mensahe nga napadala sang InSight lander sang National Aeronautics and Space Administration (NASA) halin sa Mars.
“If I can keep talking to my mission team, I will – but I’ll be signing off here soon. Thanks for staying with me,” pahayag pa sang InSight, ukon Interior Exploration Using Seismic Investigations, Geodesy and Heat Transport sa kumpleto nga pangalan.
2018 sang gin-launch ang InSight para sa isa ka history-making mission sa “inner space” sang Red Planet — buot silingon, tun-an sini ang rust, mantle, kag core sang Mars.
Ini nga craft ang nagalaba sang halos 20 ka tapak, kag nagabug-at sang halos 800 pounds.
Sa una sini nga Mars year nga katumbas sang halos duha ka ka tuig sa Earth, nalab-ot sini ang madamo nga target sang iya nga mission rason nga gin-extend pa gid ini tubtub sa 2022.
Ang nagapanguna nga mission sini amo ang paggamit sang instrumento nga ginatawag nga seismometer agud nga ma-track ang Marsquakes. Ginapahayag nga antes pa man ang Insight mission, wala pa sang ideya ang scientists nga may yara sang nagakatabo nga Marsquakes.
Sa amo nga rason, ang InSight ang ginakabig una nga naka-detect sang quakes sa lain nga planeta. Dugang pa diri, naka-measure ini sang masobra 1,300 ka seismic events.
Suno sa NASA, ini nga findings ang naghatag sa scientists sang bag-o nga ideya sa composition kag structure sang layers sa Mars kag amo ang nagpadalom pa sang ila nga paghangop sa geologic history sang surface sang Mars kag sa abilidad sini nga maka-support sa kabuhi.
Ang iban pa nga ginadumdum nga kontribusyon sang InSight amo ang pagkarga sang first-ever magnetometer instrument sa surface sang Mars (agud nga maka-detect sang magnetic signals) kag ang pagkolekta sang pinaka-komprehensibo nga weather data out sang tanan nga mission nga ginpadala didto.
Naka-detect man ini sang magnitude 4 quake sang May 2022 nga suno sa scientists, gintuga sang isa ka meteoroid strike. Bangud sini, nadiskubre sang Mars orbiter ang layer sang water ice nga nalubong underground. Gintawag sang NASA ang serye sini nga events bilang “icy bonanza.”
‘MY POWER IS REALLY LOW’
Mayo pa lang subong nga tuig, nagpaandam na ang project officials nga posible indi na maka-operate ang lander sa katapusan sang 2022 bangud sang nagtipon nga yab-ok sa iya nga solar panels rason nga nagakadula na ang power source. Sang November, nagpahayag ang NASA nga nagahilapit na ang katapusan kag gin-amat amat na tapos ang mission.
Sa Twitter, regular man ini nga naga-update sa 800,000 sini ka followers. Lakip sa mga update sini ang new discoveries, promisa nga magapadayon sa pag-operate kun masarangan pa sini, pagpahayag nga nagahilapit na ang iya nga retirement, kag tributes sa “friends” nga iya natipon sa mission.
Ang katapusan sini nga update amo ang picture sang rocky surface kag horizon line sa Mars. ##
