𝗜𝗟𝗢𝗜𝗟𝗢 𝗖𝗜𝗧𝗬 – Nag-angkon sang pagdayaw ilabi na sa mga animal welfare advocates ang duha ka mga estudyante sang St. Paul University Iloilo matapos ginsalbar ang isa ka ido nga nahulog sa canal sa G Park sa Phase 2, Benigno Aquino Ave, Diversion Rd, Cubix Park, Iloilo City.
Ini amo sanday Lemuel Magrare, 21, tumandok sang Lapuz Norte, Iloilo City, nagakuha sang kurso nga Special Needs Education kag Chex Quentin Pardilla, 23, residente sang Concepcion-Montes, Iloilo City Proper kag nagakuha sang kurso nga BS Biology.
Sa interview sang Bombo Radyo kay Magrare, iya ginpahayag nga halos 20 ka minutos na nga yara sa canal ang ido kag nagahina na.
Apang wala ini nagduha-duha nga buligan ang ido tubtob nga naluwas nila ini.
Ginpahayag sini nga nalipay ini nag-angkon sang positibo nga kumento ang ila ginhimo.
Suno naman kay Pardilla, ordinaryo lang sila nga mga tawo, apang may dako nga epekto sa komunidad ang ila ginhimo ilabi na ang pag-ulikid sa mga kasapatan.
Nagalaom man ini nga kuntani magserbe sila nga ehemplo sa mga kabataan.
Nagpanawagan man ini sa publiko nga palanggaon ang mga kasapatan.
