ILOILO – Nagapanindugan ang himata sang isa sa ginatudlo suspek sa nagluntad nga robbery hold up sa Dingle Iloilo sang dominggo nga si Dominic Fresas, 22 anyos, sang Rizal Ilawod, Calinog, Iloilo nga wala sang kahilabtanan sa nasambit nga krimen ang ila nga himata.
Sa interview sang Bombo Radyo kay Lea Fresas, iloy sang suspetsado iya ginpahayag nga makapamatuod ang record sang kapulisan nga wala sang anuman nga nahimo nga krimen ang iya nga bata humalin sang una.
Suno kay Fresas, posible nga nangin biktima lang sang sirkustansya ang iya nga bata sa diin mahimo nga may naupdan lang ini nga grupo nga may modus nga pagpangawat kag nalahig lang ini sa krimen.
Padayon naman nga nagasinggitan sang hustisya ang pamilya sang suspetsado kag nagapanawagan sila nga kun mahimo mas padalman pa ang ginapatigayon nga imbestigasyon agud mahibaluan ang matuod nga istorya kag maggwa na ang mga responsable sa nasambit nga krimen.
Nahibaluan nga sa subong, may ginasundan na nga persons of interest ang kapulisan kaangot sa dugang pa nga identity sang mga suspetsado sa robbery hold-up sa nasambit nga lugar.
