Nagguwa sa imbestigasyon sang Kongreso sa Estados Unidos sang Amerika nga nakabaton sang $7.8 million ukon masobra P435.7-million nga bayad ang mga negosyo ni anay US President Donald Trump halin sa 20 ka mga pungsod lakip na sa Pilipinas.
Natabo ini sang nagapungko pa si Trump bilang presidente sang USA.
Suno sa House Oversight Committee Democrats, ini nga nadiskubrehan nga payments ang mahimo nga parte lamang sang foreign payments kay Trump kag sa iya pamilya sang siya ang presidente sang 2017-2021.
“These countries spent — often lavishly — on apartments and hotel stays at Donald Trump’s properties — personally enriching President Trump while he made foreign policy decisions connected to their policy agendas with far-reaching ramifications for the United States,” kabahin sang report.
Lakip sa natawag nga pangalan sang mga pungsod amo ang China, Saudi Arabia, Turkey, the Democratic Republic of Congo, kag ang Pilipinas.
Suno sa report, sang 2018, samtang tuyo ni anay President Rodrigo Duterte nga maka-secure sang free trade deal kaupod sa US, nagbayad ang Philippine Embassy in Washington sang malapit $75,000 agud lamang nga mapatigayon ang Philippine Independence Day celebration sa Trump International Hotel.
“At the time, then-President Trump showed his eagerness to foster a friendly relationship with the then-President of the Philippines, Rodrigo Duterte. President Trump repeatedly praised Duterte, even as the authoritarian ruler was accused of orchestrating the extrajudicial killings of thousands of Filipino citizens,” saad sa amo nga report.
Sang ulihi, gin-anunsyo man ni Philippine Ambassador to the United States Jose Manuel “Babe” Romualdez nga magasugod na ang Pilipinas sa ginaduso nga free trade deal sa United States sang September 2018, kag posible nga matuigan pa antes makumpleto.
Sa pihak sini, nakasaad sa congressional report nga wala man nagpasugot ang Trump Administration nga makasulod sa free trade agreement kaupod sa Pilipinas.#
(Photo: Charlie Neibergall/AP)
